На Палессі русіфікуюць стэлу з назвай гораду, дзе большасць людзей лічыць роднай беларускую мову

Дзяржпрадпрыемства «Жыткавіцкі камунальнік» абвясціла тэндэр на будаўніцтва новага ўязнога знака горада. Яго хочуць усталяваць на ўчастку паблізу прымыкання мясцовай аўтадарогі да трасы «Гомель — Кобрын». На гэта хочуць выдаткаваць 50 тысяч рублёў (звыш 15 тысяч даляраў).

Да дакументацыі дзяржзакупкі прымацаваны праект знака — на шэрай стэле размешчаны герб горада і надпіс па-руску: «Житковичи».

Праект новага знака

Цяпер на тым жа месцы стаіць арыгінальны ўязны знак з драўлянымі фігурамі, дэкаратыўнымі элементамі і назвай горада на беларускай мове. Адзначым, што Жыткавіцкі раён лічыцца адным з самых беларускамоўных у Гомельскай вобласці. Па выніках перапісу насельніцтва 2009 году амаль 83% жыхароў Жыткавіцкага раёну назвалі роднай беларускую мову.

Цяперашні знак

Абвешчаная дзяржзакупка прадугледжвае выбар арганізацыі для будаўніцтва «пад ключ». Пачатак выканання прац запланаваны ўжо на сакавік, а здаць аб'ект павінны ў чэрвені. У прыблізны кошт тэндэру ўключаны праектна-даследчыя работы і кошт будаўніча-мантажных прац. Пры гэтым амаль уся сума будзе выдзелена са сродкаў заказчыка — мясцовага камунальнага прадпрыемства.