Гомельскія ўлады пабаяліся аднавіць афарбоўку помніка архітэктуры ў бел-чырвона-белым колеры
| ГісторыяКраязнаўцы з супольнасці Пошукі старога Гомеля заўважылі, што падчас рэканструкцыі помніка архітэктуры у цэнтры Гомеля мясцовыя ўлады не захацелі аднаўляць арыгінальны выгляд будынку, бо ён быў бел-чырвона-белым.
Гаворка вядзецца пра жылы дом на праспекце Леніна, які спраектаваў у 1920-х гадах гомельскі архітэктар Станіслаў Шабунеўскі. З-за таго, што на першым паверсе будынку знаходзілася рыбная крама, дом называюць «Рыбным». У канцы 2022 года дом прайшоў праз капітальны рамонт.
Краязнаўцы ўказваюць, што па першапачатковай задуме Станіслава Шабунеўскага дом меў пабеленыя першы і мансардны паверхі, а другі і трэці паверхі мелі колер натуральнай чырвонай цэглы.
Фота першапачатковай каларыстыкі "Рыбнага дома" ў 1930-х гадах (графічная рэканструкцыя)
Звыклая афарбоўка дома 1990–2010-х гадоў
Пасля рамонту каларыстыка знакамітага помніка наблізілася да арыгінальнай — але замест пабелкі з'явілася бежавая фарба, замест колеру натуральнай цэглы — аранжавая фарба.
Новы варыянт афарбоўкі пасля капрмонту 2023 года
«Ліхія часы не дазволілі аднавіць арыгінальную каляровую схему знакамітага архітэктара і аднавіць бел-чырвона-белую каларыстыку фасада», — канстатаюць краязнаўцы.
Аўтары суполкі таксама раскрытыкавалі ўвядзенне дадатковага колеру для афарбоўкі крамы на цокальным паверсе і масіўныя блокі шклопакетаў на лесвічных клетках.
Да пазітыўных зменаў краязнаўцы аднеслі толькі тое, што падчас рамонту былі адкрытыя каваныя балконныя агароджы.
0
